Temporada 2013-2014

           Achégase novembro e, con el, o traballo en Teatro Do Improvisto!
           Como todos os anos, algúns membros deíxannos e outros comezan. Temos que dar a benvida a Sandra, a nosa nova cadete. Así mesmo, este ano, Rocio e Sara nos apoian dende o extranxeiro.
           Sen máis dilación, comezamos a traballar de novo despois dun descanso ben merecido!

Entrevista a Gustavo Dieste: Promoción de Teatro Agochado

Aquí tedes o Link: «span lang="gl"O público verá a casa de cultura da Cachada dun xeito diferente/span»


«O público verá a casa de cultura da Cachada dun xeito diferente»
Dirixe un proxecto pioneiro en Barbanza de microteatro


SARA MARTÍNEZ / M. X. BLANCO
Ribeira / la voz 07 de agosto de 2013 05:00

O actor tamén leva a cabo en ocasións tarefas de control da luz e o son nas obras. CARMELA QUEIJEIRO


A casa de cultura da Cachada celebra o seu 25 aniversario. Para conmemorar o cuarto de século, tanto mañá coma o venres pola noite, acollerá unha experiencia novedosa. O grupo Teatro do Improvisto, con Gustavo Dieste á cabeza, realizará unha actividade de microteatro na que o público verá o edificio dun xeito diferente. O director, oriúndo de Teo, pero residente en Boiro desde hai case 25 anos, asegura que é unha iniciativa enriquecedora e dinámica, e espera que teña gran acollida.


-¿En que consiste exactamente o microteatro?
-É unha experiencia de teatro distinta. Mediante varias obras de curta duración facemos que o público participe directamente na composición. Búscase que compartan escenario cos actores, que os sintan respirar, que perciban cada un dos seus movementos, queremos que os participantes noten a diferenza con respecto a ver teatro dende unha butaca.

-¿Como xurdiu a oportunidade de levar esta idea á casa de cultura de Boiro?
-Esta entidade cumpre 25 anos e a concelleira de Cultura considerou que sería interesante poñerse en contacto comigo para facer algo diferente para conmemoralo. A idea xurdiu porque é un estilo que comeza a gañar popularidade en Galicia e pareceume unha boa forma de que os veciños se acercasen á Casa da Cultura e a coñecesen de forma distinta. É unha experiencia piloto na zona, é a primeira vez que se fai en Boiro.

-¿Que poderá ver o público nas diferentes obras?
-Os distintos grupos percorrerán as diferentes salas da casa de cultura mediante cinco experiencias de microteatro. Dentro de cada unha delas estarán no propio escenario, preto dos actores. Cada escena terá unha temática variada, metateatro, farsa, comedia e outros estilos para que o público disfrute de mostras de teatro diferentes. Os compoñentes do grupo de teatro estarán actuando continuamente.

-¿Por cantas persoas estarán compostos os grupos?
-Sobre 8-10 persoas irán pasando cada 20 minutos dunha obra a outra. Desta forma é máis intimo e poderán apreciar tódolos detalles.

-¿Cal é a duración estimada da actividade?
-En xeral, o percorrido de cada grupo durará 45 minutos, sumando a duración das mostras e o tempo que tarden en desprazarse dunha estancia a outra. Cada obra prolóngase entre 5 e 8 minutos. Contamos con ter sobre 5 ou 6 grupos cada noite, pero no caso de que sexan máis estaremos ata que non haxa xente.

-¿Que idade teñen os compoñentes do grupo de teatro?
-É un grupo cun rango de idade moi variado. Contamos con participantes desde os 13 anos ata os 70.

-¿Ten pensado repetir esta experiencia nalgún novo proxecto que realice?
-Se esta experiencia sae ben, xa lle botei o ollo a outros espazos do municipio boirense para repetir nun futuro unha iniciativa similar.

Gustavo G. Dieste, director de teatro

Teatro Agochado

                E por fin o espectáculo que estábades agardando! Teatro do Improvisto presenta este xoves e venres ás 22:00, na Cachada, o seu novo traballo. O edificio que nos leva agochando durante a vida da nosa compañía está de aniversario. Para celebrar os seus 25 anos, o grupo convídavos a facer unha ruta moi especial polas súas estancias. Baixo a nosa guía, poderedes recorrer o edificio e coñecer as historias que agocha. As paredes que gardan aos actores teñen moito que contar... non volo perdades!

                Recordámosvolo: os días 8 e 9 de agosto, ou sexa, este xoves e venres, ás 22:00 horas na Casa da cultura. Tendo en conta as caracterírsticas dos espazos que vos imos ensinar, formaremos grupos de 10-12 persoas, e comezarán con 20 minutos de diferencia cada un. 

                Achegádevos e disfrutade da experiencia da man de Lois Pimentel, Irene V. Coria, Rosa Saavedra, Richi Maneiro, Loreto Ábalo, Antonio Redondo, Manolo Blanco, Lucía Outeiral, Sara Nieto, Rebeca Mayo e Liza Suárez, baixo a dirección de Gustavo G. Dieste. 

Entrevista a Gustavo Dieste en Radio Boiro

Deixámosvos aquí o link á entrevista que lle fixeron a Gustavo G. Dieste, o noso director, en Radio Boiro. Gus falou da actividade que iamos a realizar o Día das Letras Galegas, de Roberto Vidal Bolaño, e de outras cuestións relacionadas coa actividade actual de Teatro do Improvisto.

Letras Galegas

                 E como xa anunciáramos, o pasado 17 de maio fixemos un homenaxe a Roberto Vidal Bolaño, conmemorado este ano nas letras galegas, e cada vez que se representa unha obra de teatro en galego. Para os teatreiros galegos é unha figura moi especial, pai do teatro profesional de galicia, e nós quixemos recordalo como máis nos gusta: Facendo teatro!

                 Armámonos cunha nariz de clown (que, como el afirmaba, che da dereito a falar libremente), unha gabardina, sombreiro, luvas brancas, e presentámonos no hall da casa do concello a representar unha versión express dun dos seus textos máis divertidos: "Animaliños".

                 Vestidos como o famoso dramaturgo, interpretamos a diversos habitantes dunha comunidade de veciños (algúns non moi humanos...) que sufrían dunha praga de caracois no seu querido xardín. Un texto cargado de intención política, adaptado en formato clown para toda a familia. Os nenos, adultos e actores desfrutamos como cativos ante este espectáculo case improvisado. 

                 Á nosa actuación acompañouna a lectura de poemas galegos por parte dos máis cativos, e unha representación de Xoán Curiel, un cantautor galego, que nos fixo bailar e pasalo ben. Mención especial en este último caso á nosa Becky, con un don para dinamizar. 

                 E despois desta actuacón recordade que, en pouco máis de 2 meses xa nos tedes de novo, con un proxecto novo e especial para nós, que nos achegará a vos máis do que pensades... Estade atentos para máis información!

Teatreiros sen tregua!

        Fai pouco máis de dúas semanas que estreamos o noso último espectáculo, pero non imos descansar! Xa estamos preparando as nosas próximas actividades:

•  Día das letras galegas: este ano, o 17 de maio adícaselle ó gran teatreiro Roberto Vidal Bolaño, e dende Teatro Do Improvisto queremos honralo. O venres 17 de maio, realizaremos na rúa unha versión "exprés" dunha súas máis fermosas obras infantiles, Animaliños. 

•  Aniversario da Casa da Cultura: este ano, cumpre 20 anos, e dende Teatro Do Improvisto imos a celebralo. A finais do mes de xullo, realizaremos un novo proxecto, un pouco distinto do que levamos facendo ata agora. As prazas para asistir a esta actuación serán limitadas, así que será necesaria a inscripción. Daremos máis detalles. De momento, só vos adiantamos que a nosa intención é chegarvos moi preto.

Así que, xa sabesdes, en Teatro do Improvisto, non nos tomamos un descanso nin para xantar. E é que nos chifla ensaiar. Hacker diravos que nos chifla ensaiar. Ata logo!

Estreo de "Morte" para morrernos de risa

                   Dende Teatro Do Improvisto queremos darlle as gracias a todos os que estibéchedes connosco esta fin de semana. Esperamos que volo fixéramos pasar ben e morrérades coa risa. Tanto para vós como para os que non estibéchedes, deixámosvos unhas fotos para recordar e resumir os mellores momentos.  

Promoción de "Morte, unha comedia" en RADIO BOIRO

Os nosos actores achegáronse o pasado luns á radio local para falar do proxecto que imos estrear esta fin de semana. Aquí tedes a entrevista!



E aquí vos deixo tamén o link da entrevista, por se acaso!

E ós nosos representantes nesta ocasión! Richi Maneiro, Pili Ouviña, Rosa Saavedra, e, a recén estrenada no formato, Irene V. Coria.


Lembrade! O venres e o sábado, ás 20.30 na Casa da Cultura de Boiro. A entrada terá un custo aproximado de 1.5 euros, e as risas estarán aseguradas.

Morte, unha comedia. De Woody Allen

                        E voltamos á escena, esta vez cunha comedia do gran dramaturgo, Woody Allen. Esta fin de semana, teremos unha estrea dobre. O venres e o sábado seremos vosos para entretervos, ás 20.30 horas, na Casa da Cultura no parque da cachada. O voso grupo municipal, sempre convosco!

                     

Nunha pequena cidade, un maníaco solto revoluciona a toda a poboación, que se lanza ás rúas para intentar atrapalo con un inxenioso e complexo plan. E Kleiman forma parte do plan. Oh, sí. Xa se lle informará....